Акафист

Кондак 1

Избра́нный уго́дниче Христо́в и преди́вный чудотво́рче, земли́ на́шея изря́дная похвало́, прославля́юще просла́вльшаго тя Го́спода, прино́сим ти от любве́ серде́чныя хвале́бное пе́ние сие́: ты же, пра́ведне Алекса́ндре, моли́ся о нас благода́рно почита́ющих свяще́нную па́мять твою, да в ра́дости се́рдца зове́м ти:

Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Икос 1

Ангел предста́тель у престо́ла Пресвяты́я Тро́ицы яви́лся еси́, пра́ведне Алекса́ндре, о лю́дех зело́ бе́дствующих и скорбя́щих в ми́ре сем, недоуме́ньми и собла́зны ве́ка сего́ лю́те обурева́емых, мы же воспомина́юще чи́стое и боголюби́вое житие́ твое́, яко свяще́нника Бо́га Вышняго почита́ем тя, возглаша́юще с любо́вию си́цевая:

Ра́дуйся, благода́ти Бо́жия сосуде избра́нный.
Ра́дуйся, изде́тска на служе́ние Бо́гу себе предугото́вивый.
Ра́дуйся, ро́да свяще́нническаго до́брая ле́торасле и многопло́дная.
Ра́дуйся, отца́ твоего́ Стефа́на ча́до благопослушное.
Ра́дуйся, яко того́ стопа́м усе́рдно после́довал еси.
Ра́дуйся, уче́нию духо́вному приле́жно внима́л еси.
Ра́дуйся, словеса́ наста́вников твои́х в се́рдце твое́м слага́л еси.
Ра́дуйся, Зако́ну Бо́жию де́нь и но́щь трудолю́бно поуча́лся еси.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 2

Ви́дя благо́е изволе́ние се́рдца твоего́, Па́стыреначальник Госпо́дь наш Иисус Христо́с благода́ть свяще́нства да́рова тебе́, благогове́йно восприи́м, свяще́нник непоро́чен Бо́га Вседержи́теля яви́лся еси, вопия́ Ему в моли́тве и дерзнове́нии мно́зе: Аллилуиа.

Икос 2

Ра́зум Боже́ственных писа́ний стяжа́в, со тща́нием и благогове́нием служе́ние свяще́нническое соверша́л еси: лю́ди о́крест живу́щия, в раско́ле пребыва́ющия, благоле́пным Богослуже́ний церко́вных соверше́нием в храм Бо́жий привле́кл еси. Ти́и же от заблужде́ний поги́бельных ко и́стине обрати́вшеся, вопия́ху тебе́ си́цевая:

Ра́дуйся, свяще́нниче наш но́вый и преди́вный.
Ра́дуйся, благоче́стия о́бразе.
Ра́дуйся, красоту Правосла́вия нам являяй.
Ра́дуйся, сло́вом Бо́жиим нас бога́тно пита́яй.
Ра́дуйся, раско́ла ре́вностный обличи́телю.
Ра́дуйся, па́губных поро́ков и суеве́рий неле́ностный искорени́телю.
Ра́дуйся, неврежде́нныя ве́ры Христо́вы пла́менный возвести́телю.
Ра́дуйся, нра́вов благочести́вых до́брый насади́телю.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 3

Си́ла Ду́ха Боже́ственнаго осени́ тя, всеблаже́нне о́тче, егда́ уме́ршаго без напутствия та́инством покая́ния со ско́рбию узре́л еси, та́же дерзнове́нною ве́рою окриляем, возгласи́л еси уме́ршему: воста́ни и испове́дуйся, яко тебе́ подоба́ет испове́датися и с бли́зкими твои́ми прости́тися. Абие уме́рый отве́рзе о́чи, зна́мением же кре́стным осени́в себе́, по испове́дании прия́в в ра́дости Те́ло и Кро́вь Христову, па́ки ми́рно почи́ о Го́споде. Ты же благода́рную пе́снь воспе́л еси Бо́гу, и́же не́сть Бо́г ме́ртвых, но живых: Аллилуиа.

Икос 3

Имеяй ве́лию ре́вность о сла́ве Божией и при́сное попече́ние о па́стве твое́й, новый храм вме́сто ве́тхаго Святе́й Тро́ице мно́гими моли́твами и труда́ми воздви́гл еси, иде́же Безкро́вную Же́ртву непоро́чно Бо́гу Жи́ву приноси́л еси. Ве́рнии же вкупе с тобо́ю в но́вом хра́ме лико́вствующе, глаго́лаху:

Ра́дуйся, по́мощию Божиею храм Святе́й Тро́ице из ка́мене воздви́гл еси.
Ра́дуйся, пре́жде о́наго обита́лище Ду́ха Свята́го в се́рдце твое́м устро́ил еси.
Ра́дуйся, Правосла́вно покланятися Три́ипоста́сному Божеству́ па́ству твою научи́вый.
Ра́дуйся, до́брый путево́ждь ко спасе́нию мно́гим яви́выйся.
Ра́дуйся, ста́до Христо́во на па́житех ева́нгельских до́бре упа́сл еси.
Ра́дуйся, пле́велы суеве́рий и раско́льнических мудрова́ний дале́че отогна́л еси.
Ра́дуйся, заблуждшия о́вцы во огра́ду Святыя Це́ркви возврати́л еси.
Ра́дуйся, покая́нию о́нех вельми́ возра́довался еси.
Ра́дуйся, пра́ведне Алекса́ндре, моли́твенниче о нас пред Бо́гом те́плейший.

Кондак 4

Бу́рею жите́йских бед и скорбе́й потопляемии, к тебе́ яко к до́брому па́стырю и отцу чадолюби́вому вседу́шно притека́ху: зря́ще ми́лостивное к ним добросерде́чие твое́ и сострада́ние, пра́ведне Алекса́ндре, утеше́ния духо́внаго исполняеми, со умиле́нием пояху Бо́гу: Аллилуиа.

Икос 4

Слышаша лю́дие боговдохнове́нныя поучения твоя, к покаянию и исправле́нию жи́тельства своего́ устреми́вшеся, от грехо́в и страсте́й отвраща́ющеся, в ра́зум и́стинный прихожда́ху, и твое́ю учи́тельною бесе́дою назида́ющеся, о́бразом же жития́ твоего́ умиляющеся, глаго́лаху:

Ра́дуйся, покая́ния велегла́сный пропове́дниче.
Ра́дуйся, доброде́тельнаго жития́ богомудрый наста́вниче.
Ра́дуйся, па́стырю наш предо́брый.
Ра́дуйся, учи́телю наш кро́ткий.
Ра́дуйся, а́лчущия и жа́ждущия ду́ши Хле́бом Небе́сным пита́яй.
Ра́дуйся, скорбя́щия и обремене́нныя упова́нием на Ма́терь Бо́жию укрепляяй.
Ра́дуйся, не́мощныя и стра́ждущия бла́гостию твое́ю покрыва́яй.
Ра́дуйся, всем тре́бующим твое́я по́мощи ми́лостивно сию подава́яй.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 5

Боготе́чней звезде́ уподо́бился еси, уго́дниче Божий Алекса́ндре, ука́зуя спаси́тельный путь во тьме́ грехо́вней блужда́ющим, све́том за́поведей Христо́вых всех просвеща́я и вразумляя, до́брых сердца́ в Правосла́вии утвержда́я, лени́вых и неради́вых при́сно воздвиза́я к пе́нию Бо́гу: Аллилуиа.

Икос 5

Ви́деша множа́йшия лю́ди благонра́вное житие́ твое́, страннолю́бие и нищелю́бие, в храм Бо́жий со усе́рдием приходяще, святоле́пным лица́ твоего́ зра́ком утеша́хуся, в не́мже яве красота́ Боже́ственнаго образа и подо́бия являшеся, и возглаша́ху тебе́ та́ко:

Ра́дуйся, Боже́ственныя благода́ти прия́телище.
Ра́дуйся, дарова́ний духо́вных нете́сное вмести́лище.
Ра́дуйся, свяще́нства велеле́пая красото́.
Ра́дуйся, па́стырскаго по́двига премудрая доброто́.
Ра́дуйся, ве́лию ве́ру ко Христу стяжа́л еси.
Ра́дуйся, непреста́нную моли́тву в се́рдце твое́м возгрева́л еси.
Ра́дуйся, пла́менную любо́вь к Бо́гу и бли́жним показа́л еси.
Ра́дуйся, чистото́ю серде́чною и смиренномудрием укра́сился еси.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 6

Пропове́дник Правосла́вныя ве́ры и благоче́стия чрез все́ житие́ твое́ быв, пра́ведне Алекса́ндре, сло́вом и де́лом сие́ запечатле́вый; егда же преста́ревся, восхоте́л еси ма́ло почи́ти от трудо́в твои́х, оба́че Господь на вящший подвиг тя подвиза́я, в Ча́гринскую Покро́вскую обитель стопы твоя напра́ви, ты же, повинуяся Про́мыслу Бо́жию, вся во благо́е устрояющему, со смире́нием воспе́л еси Бо́гу: Аллилуиа.

Икос 6

Возсия́ша сугу́бо во оби́тели Ча́гринстей духовная дарова́ния твоя, яже стяжа́л еси благода́тию Свята́го Духа, в тя все́льшагося, о́тче пра́ведне. Те́мже оби́тель о́ная и насе́льницы ея, обре́тши та́коваго па́стыря и ко́рмчаго, укрепляющаго их на пути́ и́ноческаго де́лания, в ра́дости серде́чней сия́ ти глаго́лаху:

Ра́дуйся, до́браго по́двига вождю.
Ра́дуйся, новоустрое́нныя оби́тели утвержде́ние.
Ра́дуйся, моли́твы непреста́нное возноше́ние.
Ра́дуйся, к Богу при́сное собесе́дование.
Ра́дуйся, чи́стых де́в со Христо́м непоро́чный обручи́телю.
Ра́дуйся, в труде́х и подвизех их усе́рдный соревнова́телю.
Ра́дуйся, яко наставле́нии твои́ми и́нокини в терпе́нии укрепляхуся.
Радуйся, яко воздыха́нии твои́ми ко́зни вра́жия нивочто́же вменяхуся.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 7

Хотя Человеколю́бец Госпо́дь ниспосла́ти ми́лость Свою лю́дем земли́ нашея, да́рова тя в ско́рбех помощника, в недузех врача благода́тна, отча́явшимся наде́яние, лю́тыми по́мыслами и унынием смуща́емым кро́ткаго вразуми́теля, и все́м во всякой нужде́ и обстоянии сущим до́браго наста́вника, зову́щим непреста́нно ко Творцу своему: Аллилуиа.

Икос 7

Но́ваго тя и пресла́внаго чудотво́рца яви́ Госпо́дь в земли́ Пово́лжстей, егда́ не то́кмо в бли́жних, но и в да́льних страна́х услышано бысть о мно́гих чудесе́х, твои́ми моли́твами соверша́ющихся во оби́тели Чагринстей, болящия бо от многоразли́чных недугов исцеляхуся, бе́сныя свобожда́хуся и вси в ско́рби сущия осла́бу и по́мощь прие́мше, глаго́лаху:

Ра́дуйся, болящих ско́рое врачева́ние.
Ра́дуйся, скорбя́щих благо́е уте́шение.
Ра́дуйся, бе́сных от де́монов изба́вление.
Ра́дуйся, неду́гующим и стра́ждущим благода́тное вспоможе́ние.
Ра́дуйся, пома́занием освяще́нным еле́ем боле́зни врачева́вый.
Ра́дуйся, воды святыя причаще́нием и окропле́нием исцеле́ния сподо́бивый.
Ра́дуйся, с ве́рою приходящим по́мощь неоскудно подава́яй.
Ра́дуйся, моли́твами твои́ми от ско́рбных обстояний мно́гажды изба́вляй.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 8

Стра́нное и ди́вное бысть та́инство, егда́ Сердцеве́дец Госпо́дь да́ром прозре́ния обогати́ тя, о́тче Алекса́ндре, та́йны серде́чныя и деяния сокрове́нныя не скрышася от тебе́, яко всем приходящим е́же житию их потре́бная и душеспаси́тельная благода́тию Духа Свята́го возвеща́л еси. Лю́дие же, слышаще та́ковая, со стра́хом и умиле́нием вкупе с тобо́ю вопия́ху Бо́гу: Аллилуиа.

Икос 8

Всего себе́ на служе́ние Богу и бли́жним преда́л еси, о́тче пра́ведне, сострада́нием бо и милосердием ко стра́ждущим преклоняем, не престава́л еси врачева́ти недуги душе́вныя и теле́сныя, благода́тию Божией в та́инствах церко́вных преизоби́льно подава́емою. Ти́и же благода́ть сию восприе́мше, взыва́ху тебе́ та́ко:

Ра́дуйся, не́мощи не́мощных долготерпели́вно понесый.
Ра́дуйся, упова́ния еже на тя не посрами́вый.
Ра́дуйся, врачу кро́ткий и ми́лостивый.
Ра́дуйся, смире́нных се́рдцем отец чадолюби́вый.
Ра́дуйся, ка́ющихся во гресе́х свои́х непостыдное упова́ние.
Ра́дуйся, на путь спасе́ния обраща́ющихся любвеоби́льное ободре́ние.
Ра́дуйся, подвиза́ющимся на пути́ се́м всеси́льное укрепле́ние.
Ра́дуйся, благотекущих при́сное ра́дование.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 9

Все житие́ твое́ от юности да́же до глубо́кой ста́рости в моли́твенном предстоянии Богу и па́стырском служе́нии провожда́емое, к концу прибли́жися. Егда́ же приспе́ вре́мя твоего́ отше́ствия, благоволи́л еси, да кано́н пасха́льный пропоют тебе́, та́же лицу твоему све́тло озари́вшуся, ти́хо и ми́рно преда́л еси душу твою Бо́гу, блаже́нне Алекса́ндре, предстоящим о́крест и надгро́бное пе́ние поющим: Аллилуиа.

Икос 9

Вити́йства суемудрых и лю́тых отступников посрами́шася, не мо́гущих благода́рную па́мять изкорени́ти из серде́ц ве́рных ча́д твои́х. Всуе бо тружда́ющеся непокори́вии, го́рце разори́ша оби́тель Ча́гринскую, оба́че ме́сто погребе́ния твоего́, Про́мыслом Божиим сохране́нное, нико́лиже забве́нию преда́но бысть, любо́вию посеща́ющим тя и зову́щим:

Ра́дуйся, блаже́нною кончи́ною Богоуго́дное житие́ твое́ запечатле́вый.
Ра́дуйся, от земных во оби́тели Небе́сныя пресели́выйся.
Ра́дуйся, по труде́х и по́двизех твои́х блаже́нное упокое́ние прия́вый.
Ра́дуйся, ве́чную жизнь со Христо́м во Ца́рствии Его́ улучи́ти сподо́бивыйся.
Ра́дуйся, лице́м к лицу ра́достно ныне Того́ созерца́яй.
Ра́дуйся, и нас ко гро́бу твоему приходящих умиле́ния исполняяй.
Ра́дуйся, па́ству твою по отше́ствии свое́м не оста́вивый.
Ра́дуйся, и нас от Небе́сных с любо́вию назира́яй.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 10

Спасе́ния на́шего всячески взыскуя, Всеблаги́й Госпо́дь да́рова роду сему благоутро́бную ми́лость Свою: преше́дшим бо ле́том сто́м по кончи́не твое́й, приснопа́мятне о́тче Алекса́ндре, обрето́шася целе́бныя мо́щи твоя, да вси зря́щии благода́ть та́ковую, воспоют ди́вному во святых Свои́х Бо́гу благода́рственную пе́снь: Аллилуиа.

Икос 10

Стена́ тве́рдая и заступле́ние необори́мое оби́тели Иверстей, восприя́вшей со благогове́нием и ра́достию святыя мо́щи твоя, яви́лся еси, пра́ведне Алекса́ндре. И па́ки мона́шествующии и про́стии лю́дие с ве́рою и любо́вию притека́ющии к честным моще́м твои́м, ча́юще прия́ти от тебе́ по́мощь в нуждах свои́х, усе́рдно зову́т ти:

Ра́дуйся, заре́ пресве́тлая, нощи́ преше́дшей возсия́вшая.
Ра́дуйся, луче́, тьму грехо́вную разгна́вший.
Ра́дуйся, яко моле́ния на́ша исполняти не преста́л еси.
Ра́дуйся, яко отступле́ния и согре́шения оте́ц на́ших не помянул еси.
Ра́дуйся, и нас враго́м проща́ти по за́поведи Христовой науча́яй.
Ра́дуйся, на путь спаси́тельнаго покая́ния наставляяй.
Ра́дуйся, и́ночествующих от искушений изба́вление.
Ра́дуйся, от нападе́ний де́монских кре́пкое заступле́ние.
Радуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 11

Пе́ние умиле́нное от любве́ чи́стыя прино́сим ти, святче Бо́жий, скорбьми́ и искуше́ниями ве́ка сего коле́блемыя, зря́ще бо нищету свою духо́вную, малове́рие и малодушие, друг пред другом возноше́ние и окамене́ние серде́чное, мо́лим тя смире́нно: испроси́ у Го́спода грехо́в проще́ние, житию исправле́ние, да доброде́тельми просвети́вшеся, воспое́м Бо́гу: Аллилуиа.

Икос 11

Свети́льник ве́ры Правосла́вныя и сто́лп благоче́стия яви́лся еси в земли́ Сама́рстей, пра́ведне Алекса́ндре, сло́вом, житие́м, ве́рою и любо́вию, чисто́тою и смире́нием просия́л еси, те́мже и нас све́том твоим озари́ и укрепи́ вслед тебе́ непреткнове́нно путе́м за́поведей Христо́вых ходи́ти, да благода́рственное сотвори́м ти пе́ние:

Ра́дуйся, свети́льниче, не под спудом, но на све́щнице церко́вней поста́вленный.
Ра́дуйся, от Све́та Присносущнаго бога́тно осия́ваемый.
Ра́дуйся, у престо́ла Святыя Тро́ицы о нас всемо́щный предста́телю.
Ра́дуйся, милосе́рдия Бо́жия к нам хода́таю.
Ра́дуйся, молящихся к тебе́ ско́рый слышателю.
Ра́дуйся, смире́нных и незло́бивых се́рдцем покрови́телю.
Ра́дуйся, грехо́внаго сна разгна́телю.
Ра́дуйся, духовныя бо́дрости пода́телю.
Ра́дуйся, пра́ведне Алекса́ндре, моли́твенниче о нас пред Бо́гом тепле́йший.

Кондак 12

Благода́ть ве́лию и дерзнове́ние в моли́тве еще в земне́м житии́ твоем бога́тно стяжа́л еси, пра́ведне Алекса́ндре, те́мже то́я благода́ти и нас прича́стники сотвори́ твои́ми богоприя́тными моли́твами, да от грехо́вных страсте́й изба́вльшеся, в чистоте́ и пра́вде поживе́м до конца́ дне́й на́ших, вопиюще Спаси́телю Бо́гу: Аллилуиа.

Икос 12

Поюще твое́ богоугодное житие́ на земли́, и на небеси́ в явле́нии честных мощей твои́х прославле́ние, молим тя смире́нно, блаже́нне Алекса́ндре: утверди́ моли́твами твои́ми Правосла́вную веру в стране́ на́шей, от неве́рия, е́реси и раско́лов огражда́я и защища́я нас, да безболе́зненное и ми́рное житие́ пожи́вше, тебе́ благоде́телю и заступнику на́шему хвале́бное пе́ние воспое́м си́цевое:

Ра́дуйся, оби́тели Покро́ва Пресвятыя Бого́родицы изве́стная похвало́.
Ра́дуйся, Сама́рския Иверския оби́тели преди́вное украше́ние.
Ра́дуйся, оби́тель сию от всякаго зла́ сохраняяй.
Ра́дуйся, ми́лостиво свыше на нас призира́яй.
Ра́дуйся, избра́нниче Бо́жий в со́нме святых земли́ Росси́йския просла́вленный.
Ра́дуйся, заступниче наш во дни сия́ многотрудныя нам да́рованный.
Ра́дуйся, всем в доброде́лании тружда́ющимся по́мощь от Го́спода подава́яй.
Ра́дуйся, па́мять твою почита́ющих любвеоби́льно посеща́яй.
Ра́дуйся, пра́ведне Алекса́ндре, моли́твенниче о нас пред Бо́гом теплейший.

Кондак 13

О всеблаже́нне пра́ведне Алекса́ндре, земли́ на́шея пресве́тлый свети́льниче и изря́дный чудотво́рче! Ма́лаго сего моле́ния, от недосто́йных усте́н на́ших тебе́ приноси́маго, не пре́зри, но бу́ди нам в ве́ре и покая́нии наста́вник, во благоче́стии подвиза́ющимся благи́й помо́щник и о спасе́нии на́шем неусыпный пред Бо́гом моли́твенник, о тебе́ вопиющих Го́споду: Аллилуиа.

Сей кондак читается трижды. Затем икос 1-й и кондак 1-й.

Молитва

О вели́кий и пречу́дный уго́дниче Христо́в, о́тче наш пра́ведне Алекса́ндре, земли́ Пово́лжския благо́е прозябе́ние и хода́таю о всех зде живу́щих и повсю́ду тружда́ющихся Правосла́вных христиа́нах: воззри́ ны́не на нас, недосто́йных, ми́лостивным твои́м о́ком и ви́ждь я́ко зело́ умно́жишася ско́рби и злострада́ния в ми́ре сем, во гресе́х и беззако́ниих иждива́ем дни своя́, да́нное же нам вре́мя на покая́ние в су́етных и многомяте́жных страсте́х провожда́юще, уми́льно про́сим и мо́лим тя, засту́пниче наш: помози́ нам, ча́дом твои́м, и испроси́ предста́тельством твои́м ко Всевы́шнему Влады́це вся я́же к житию́ и благоче́стию поле́зная и благопотре́бная: боля́щия исцели́, немощны́я подкрепи́, печа́льныя и уны́лыя ободри́, скорбя́щия уте́ши и пове́рженныя возста́ви. Вознеси́, уго́дниче Бо́жий, всемо́щную моли́тву твою́, да утверди́тся в держа́ве на́шей ми́р и благоде́нствие, благоче́стие и единомы́слие, да пребу́дет во благи́х челове́цех пра́вда и ми́лость, в злых же страх и раска́яние, во е́же преста́ти им от зла и твори́ти до́брая, да тобо́ю наставля́еми и вразумля́еми, просла́вим ди́внаго во Святы́х Свои́х Бо́га, Ему́же Еди́ному подоба́ет вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.

Акафист
Скачатьpdfmp3
Наверх